想試吓一個人整chabot? 首先可以從產品週期著手

整chabot需要幾多人力物力好視乎該chatbot嘅潛在用戶有幾多、內容有幾深入、以及幾頻繁需要更新同分析客戶對話。

如果你係一個人開網店/fb專頁/網站嘅朋友,想整一個有人工智能成份嘅chatbot(本文假設使用dialogflow,因為最方便開發),以下嘅思維及步驟必不可少:

1.定義服務範疇

首先,你需要為chatbot定義好佢可以對答嘅範疇,盡量越清晰同精細為佳,例如:查詢貨品資訊、查詢報讀課程、查詢最新優惠等等。最主要原因係你一個人需要諗曬所有可能嘅問題與答案,如果範疇太過廣或模糊就會令到你花太多時間去開發,又或者你誤以為做簡單嘅對話設計就滿足到用家,結果個體驗都係唔好。

錯誤方向:假設你有一個美容blog,你放咗一個chatbot落去。但chatbot嘅對話設計都係隨意咁想像用戶會問啲咩,結果好有機會用戶會問咗好多超出你預期嘅野,結果得唔到答案。

定義好服務範疇非常重要,一方面你要限定好自己需要設計幾多對話(控制時間成本),一方面喺推出chatbot嘅時候引導客戶提問邊類型嘅問題(控制期望),等佢地唔好偏離你原先嘅設計。所以例如你係MTR app可以問chatbot由邊個地方去邊個地方,但如果你問MTR某份職位空缺嘅資訊,佢就好可能答唔到你喇。

2.對話(流程)設計

其次,你需要做好對話(流程)設計。對話設計可以簡單劃分為兩種,一種係單問單答嘅問題,例如:

問:你今日食咗飯未啊?

答:食咗喇

亦可以係一啲有流程嘅對話,例如:

問:我想買對鞋

答:多謝你對我地嘅鞋款有興趣,請問想要男裝定女裝?

問:男裝

答:請問你嘅尺碼係(歐洲)?

問:41

答:你好,以下係我地店鋪可供選購嘅鞋款,請參考一下… (下刪300字及圖片)

呢種對話需要先定義好該問題有咩必要資料需要收集,例如係用戶性別,尺碼等等,最好先因應佢嘅問題提供答案。補充:設計時亦需要考慮客戶會唔會有好多方法去回答一條問題,例如尺碼可以分好幾種,喺反問用戶嘅時候就需要引導定客戶。

3.測試及優化

當你設計好問題同答案嘅時候,就需要試下不斷問問題,睇吓chatbot係咪可以答到你範疇以內嘅資訊。如果效果未如理想,可以從以下兩個方向著手:

1.訓練更多問法

2.補充更多意圖(intent,可先簡單理解為一問一答)

4.前端銜接或開發

如果你使用dialogflow,佢本身已經提供咗多款前端銜接方法比你,例如facebook、line、預設嘅web前端等等。

如果你係希望有一個客製化嘅UI,咁當然需要自己另外開發了。

5.發佈

當你滿意chatbot效果嘅時候,你就可以發佈你嘅chatbot了。

6.再訓練

每個人整chatbot都係有佢嘅局限,只係將大部份人常問嘅問題納入去chatbot,等佢可以答到大部份問題。而設計過程亦總有機會有遺漏,所以發佈咗之後並唔係一勞永逸,而係要定期檢視吓客戶提問係咪得到合理答案,如果唔係,就需要從新增問法、新增意圖,又或者從chatbot嘅接入點引導用戶提問形式,例如歡迎語、使用方法介紹。

一個人整chatbot其實係可以嘅,前提係你需要規劃好chatbot範疇,發佈嘅時候亦清楚解釋chatbot用途,配合充足時間設計對話,咁就可以做得到。之後都會分享下本網站係新年時期製作chatbot嘅經驗,唔好錯過。