廣東話開始無market?其實我地咪就係市場咯

語言係文化嘅載體,越用佢就越有生命。就好似一個城市,大家嘅集體意識同行為先可以賦予佢靈魂。市場優先嘅原則下,多人用嘅語言自然得到青睞,少人用嘅就逐漸被淘汰。

世界約有 7111
活語言

呢個數字非常緩慢咁下降。相比之下,香港使用緊嘅廣東話已經算係強勢,全球有6600萬人以廣東話為母語。但係中港融合、大市場政策、全球化競爭、教育等因素,都令廣東話嘅文化漸走下坡。

大家有無發覺呢廿年,香港越來少港產片同廣東歌? 好多電影界好有地位嘅演員都零片酬、象徵式片酬去拍攝,包括敢言有型嘅秋生哥。

(電影《淪落人》相片)

點先可以令廣東話代代相傳,「不變形、不走樣」?

其實市場就係我地所組成,消費選擇固然係其中一種。近期大家去餐廳食飯都可能唔只顧住自己個胃,仲會睇吓飯餸嘅色水係咪啱胃口。其實文化生活都一樣。揀多一套港產劇集、睇多一套本地舞台劇、聽多一首廣東歌,都係支持廣東話嘅行為。

如果可以嘅話,不妨踏出多一步,一齊用多d廣東話去創作。例如寫吓任何題材嘅粵文,作吓歌仔,甚至係整個識解同識講廣東話嘅chatbot,都係好好嘅方法。試想像吓如果有日網店已經唔會再有真人客服答你問題,佢明你打/講廣東話,又識覆你廣東話,成件事都冧好多啦 =]

所以本網係會盡量以粵文書寫,亦會教大家關於chatbot實作嘅二三事。另外亦打算Medium會擺放書面語版本,一文兩睇,任君選擇。如果你有興趣,不妨like本網站嘅facebook,又或者留低email訂閱我地喇!

Medium版本請按我

#香港人寫粵文 #香港加油 #自製chatbot